काठमाडौं, – नेपाली सिनेमा उद्योगको बहुप्रतिक्षित चलचित्र ‘सतीदेवी’को काठमाडौं प्रिमियर भव्य रूपमा सम्पन्न भएको छ। प्रिमियर शोमा चलचित्र क्षेत्रका प्रतिष्ठित कलाकार, निर्देशक, निर्माता, तथा सञ्चारकर्मीहरूको उल्लेखनीय उपस्थिति देखियो।
‘सतीदेवी’ले नेपाली समाजमा भएका ऐतिहासिक घटनाहरूको चित्रण गर्दै नारी शक्तिको कथा सुनाउँछ। चलचित्रमा प्रमुख भूमिकामा रहेको अभिनेत्रीको सशक्त अभिनयले दर्शकहरूको मन जितेको छ। चलचित्रका निर्देशक लक्ष्मण सुवेदी ले प्रिमियरपछि मिडियासँग कुरा गर्दै चलचित्रले समाजमा नयाँ सन्देश दिने विश्वास व्यक्त गरे।
चलचित्र ‘सतीदेवी’ देशभरिका हलहरूमा प्रदर्शन हुने तयारीमा छ। प्रिमियर शोमा सहभागी दर्शकहरूले चलचित्रको कथा र प्रस्तुतीकरणको खुलेर प्रशंसा गरेका छन्, जसले गर्दा ‘सतीदेवी’ले नेपाली सिनेमा उद्योगमा नयाँ उचाइ लिने सम्भावना देखिन्छ। अभिनेत्री मलिका महतको काम विशेष प्रशंसायोग्य छ। उनले पर्दामा देखाएको सजीव अभिनयले प्रभावित बनाउँछ। त्यस्तै, कुलदीप अधिकारी, सृजना अधिकारी र बाल कलाकारहरू तथा अन्य कलाकारहरूको वास्तविक अभिनयले मन जित्नेछ।
प्रिमियर शोको समापनमा चलचित्र निर्माण टोलीले सबै दर्शक र समर्थकहरूलाई धन्यवाद व्यक्त गर्दै आगामी दिनमा पनि नेपाली चलचित्रलाई माया र समर्थन जारी राख्न आग्रह गरेका छन्।
